البتر تشيكن الهندي - دجاج بالزبدة

 

البتر تشيكن أو الدجاج بالزبدة أو زي ما يسمونه في الهند مرق مكاني أو مخاني

Murgh Makhani

المقادير

للتتبيلة

ملعقتين صغار زنجبيل مهروس

ملعقتين صغار ثوم مهروس

ملح

ملعقة صغيرة ونص فلفل حار بودرة

عصير ليمونه

800 جرام دجاج بدون عظم مقطع قطع كبيرة نسبيا

علبة زبادي مصفية من المية الزايدة - بشرح الطريقة تحت

3 ملاعق كبيرة زيت

نص ملعقة صغيرة جارام ماسالا

نص ملعقة صغيرة كركم

لصوص الطماطم

كيلو و 250 جرام طماطم طازج مقطع أرباع - تقريبا 5 طماطات كبيرة

واحد إنش تقريبا زنجبيل مهروس

5 فصوص ثوم مقشرة

4 حبات هيل أخضر

حبتين قرنفل

ورقة غار

للمرق النهائي

ملعقة كبيرة ونص فلفل حار كشميري Kashmiri chili powder

واحد إنش زنجبيل مقطع صغار

قرنين فلفل أخضر حار طازج مقطع أرباع بالطول

ملعقة صغيرة ونص ورق حلبة مجفف - كاسوري ميتي Kasouri mehti

نص ملعقة صغيرة جارام ماسالا

ملح

سكر

نص أصبع زبدة بارد مقطع مكعبات

نص كوب كريمة

بالنسبة للدجاج تقدرون تستخدمون صدور أو أفخاذ بدون عظم وبدون جلد أو تسوون زي ما أسوي

وتستخدمون كامل الدجاجة بعد تخلية القطع من العظم والجلد

الفخوذ أفضل هنا لأنها تستحمل الطبخ الطويل

أحسن من الصدور اللي إذا ما أنتبهتوا إحتمال كبير تنشف بسهولة

قطعوا الدجاج قطع كبيرة نسبيا يعني تقريبا 1 ونص إنش في 1 ونص إنش

عملية الطبخ هنا طويلة وسهل ينشف الدجاج لو كان مقطع صغار مره

الزبادي مليانه ميه والميه عدو التحمير وبتخفف أي نكهة نخلطها مع التتبيلة

عشان كذا أفضل تشيلون المية الزايدة في الزبادي

العملية تافهة وماتاخذ وقت طويل جيبوا صفاية

وحطوا داخلها شاش أو مناديل رول ثقيلة وحطوا الزبادي عالمناديل أو الشاش

وبعدين حطوا الصفاية داخل صحن ثاني وخلوهم في الثلاجه

بعد تقريبا نص ساعة بتلاقون مية كثيره تجمعت في الصحن

نص ساعة تكفي هنا بس يمديكم تنشفون الزبادي من اليوم اللي قبل لو تبون

لاحظوا كمية المية اللي طلعت في نص ساعة بس من علبة زبادي وحده

أبعدوا تماما في هذي الوصفة عن الجارام ماسالا المطحون الجاهز

كمية البهارات هنا مش كثيرة

والجارام ماسالا هو اللي بيعتمد عليه عشان يعطي الطبق كل نكهات البهارات الموجودة فيه

الفلفل الكشميري يختلف عن الفلفل المطحون العادي

هو مصنوع من نوعية فلفل مختلفة وهو يعطي لون أحمر قوي ونكهة

خاصة فيه بس ما يعطي حرارة كثيرة

الكاسوري ميتي Kassori Mehti

هو ورق نبات الحلبة المجفف

زي الكزبرة الناشفة والكزبرة الطازة الطعم مختلف تماما وهذا موب بديل لهذا

لا تستخدمون بذور حلبة هنا لازم لازم لازم ورق الحلبة

لأن بدونه طعم الصوص ماراح يكون نفس الشي أبدا

الكاسوري ميتي بعد متوفر في كل مكان وكل سوبرماركت يسمونه أحيانا ورق حلبة funegreek leaves

وأحيانا بإسمه الحقيقي كاسوري ميتي

الطريقة

للدجاج و التتبيلة

نخلط الدجاج مع عصير الليمون والزنجبيل والثوم وشوي ملح وبودرة الفلفل في صحن

ونفرك الدجاج فيهم زين ونخليه يتتبل في الثلاجه نص ساعة تقريبا

الحين نزيد عالدجاج الزبادي والجارام ماسالا والكركم والزيت

ونخليه يتتبل زيادة نص ساعة عالأقل أو ساعتين يفضل لو عندكم وقت

ممكن حتى تتركونه يتتبل طول الليل لو تبون عشان توفرون وقت

والدجاج قاعد يتتبل نجهز الشواية

في الهند يستخدمون فرن تنور بس ما أعتقد أحد عنده ؟

نقدر نشوي الدجاج هنا عالفحم أو على شواية غاز لو عندنا

أو أستخدموا شواية الفرن زي ما أنا أسوي النتيجة بتطلع رهيبة دايما

وممكن تستخدمون هذي الحركة لأي شي تبون تشوونه داخل البيت

نشغل الفرن من فوق ونحطه على أعلى حرارة ممكنة

ونرفع الرف حق الفرن للرف العلوي

بحيث إن المسافة بين الأكل و السخانات حقت الفرن تكون تقريبا 1-1 إنش بس نجيب صينية فرن

ونغطيها بقصدير ونحط فوق القصدير شبك تبريد

(تأكدوا إن مافيه أي بلاستك)

ندخل الصينية حقت الشوي في الفرن عالرف العلوي

ونخليها تحتر مع الفرن إلين الفرن و الصينية يصيرون جدا حارين

دى صينيه الشوى

والصينية قاعدة تحتر نجهز الدجاج

نشيل الدجاج من التتبيلة

وننشفة من التتبيلة الزايدة بإننا نحطه في صينية مبطنه بمناديل رول ثقيلة

نطلع صينية الشوي الحارة من الفرن ونرص الدجاج عليها ونخليه مفرق عن بعض شوي

بعدين نرجع الصينية بالدجاج عليها للفرن عالرف العلوي

(الدجاج لازم يكون قريب من النار هنا)

نطبخ الدجاج إلين يتحمر الوجه الأول تقريبا 3 دقايق كذا

وتطلع عليه علامات الشوي بعدين نطلع الصينية

ونقلب الدجاج ونطبخ الوجه الثاني بعد إلين يتحمر وينشوي شوي

لصوص الطماطم

وإحنا قاعدين نطبخ الدجاج نجهز صوص الطماطم في قدر ستانلس

أنتبهوا من الألمنيوم يتفاعل مع الطماطم

نحط الطماطم مع نص كوب ميه تقريبا والثوم والزنجبيل والهيل والقرنفل وورقة الغار

نطبخ الخليط مع التقليب من وقت لوقت إلين يذوب الطماطم تماما ويتحول لشي يشبه الصوص

نطحن الصوص في خلاط بعدين نصفيه ونرجعه لقدر ثاني

لصوص البتر تشيكن

نرجع صوص الطماطم لغلية خفيفة بعدين نحط الفلفل الكشميري

نطبخ الصوص إلين يبدأ يثقل علينا بعدين نحط عليه الدجاج المشوي

وأي مية نزلت من الدجاج في الصينية اللي تحت الدجاج

نحط الفلفل الأخضر الحار والزنجبيل والكاسوري ميتي

ونطبخ الصوص زيادة إلين يصير ثقيل

ويقدر يغطي الدجاج تقريبا 4-5 دقايق

الحين نحط الكريمة والجارام ماسالا وننزل الحرارة بحيث ما تغلي بقوة

نذوق الخليط ونعدل الملح والجارام ماسالا والسكر حسب الرغبة

يمكن ما تحتاجون سكر حسب حلاوة الطماطم اللي مستخدمين

بعدين نطفي النار

ونحط الزبدة ونحرك الصوص إلين تختفي الزبدة ويصير الصوص لامع

نذوق مرة ثانية

ونعدل الطعم بعدين نقدم البتر تشيكن مع خبز نان

رز أبيض أو أي شي ثاني تحبون